Xitoy hukumati mamlakatda Gollivud filmlarini qo‘yish bo‘yicha o‘rnatgan cheklovlarni qisqartirmoqda, deya xabar beradi "RosBiznesKonsalting” nashri "Reuters” agentligiga tayangan holda. AQSh va Xitoy Xalq Respublikasi vitse-prezidentlari Jozef Bayden va Si Szinpin o‘rtasida bo‘lib o‘tgan muzokaralar samarasi o‘laroq Xitoyda Amerika filmlarini suratga olish hamda ularni aholiga ko‘rsatish bo‘yicha bir qancha cheklovlar olib tashlandi. [ ?]

Bunga o‘xshagan kelishuvlar Amerika kinostudiyalari va mustaqil rejissorlar uchun Xitoyning ulkan kinobozoriga yo‘l ochib beradi. Natijada qo‘shimcha ishchi o‘rinlari yaratiladi. Prodyusserlar esa o‘z kinomahsulotlarini Xitoyda ham namoyish qilish ortidan katta foyda olishlari mumkin.

Eslatib o‘tamiz, shu kungacha Xitoyda yiliga eng ko‘pi bilan 20 ta xorijiy filmni namoyish qilishga ruxsat berilgan bo‘lib, bundan tashqari, "praym-taym” vaqtida xorijiy seriallarni qo‘yish ham ta’qiqlangan.

Amerika kinokompaniyalari assotsiatsiyasining (MPAA – Motion Picture Association of America) ta’kidlashicha, yangi kelishuv natijasida Xitoy bozoriga kirib keluvchi Amerika filmlarining soni 50 foizgacha ortadi. Bundan tashqari, Xitoyga kirib keluvchi 3D va IMAX formatidagi filmlarning ham soni o‘sishi kutilmoqda.

Xitoyning kinobozori dunyodagi eng istiqbolli va shu bilan birga eng tez rivojlanayotgan bozorlardan biri sanaladi. 2003-yilda Xitoy kinobozori atigi 150 million dollarni tashkil qilgan bo‘lsa, 2011-yilga kelib bu ko‘rsatkich 2 milliard dollardan oshib ketdi.

Shunday qilib, Amerikaning "DreamWorks Animation” kinostudiyasi birinchilardan bo‘lib Shanxayda yangi filmlar suratga olish va ularni Osiyo bozoriga chiqarish uchun katta studiya qurishga kirishmoqda.